proposal တစ်စောင်ကို ဘယ်လိုရေးရမလဲဪ

(စာတော်တော်ရှည်ပါမယ်ခဗျ)

Proposal ဆိုတာက ကိုယ်လုပ်ချင်တဲ့ project တစ်ခု (ဥပမာ – အိမ်ဆောက်တာ၊ software တစ်ခုရေးတာ၊ event တစ်ခုလုပ်တာ) အတွက် ရည်ရွယ်ချက်၊ ဘယ်လိုလုပ်မယ်၊ ဘယ်လောက်ကုန်ကျမယ် စတာတွေကို အသေးစိတ်ရေးပြီး တင်ပြတဲ့ စာတစ်စောင်ဖြစ်ပါတယ်။

Proposal တစ်စောင်မှာ ဘာတွေပါရမလဲ

1. ခေါင်းစဉ် (Title)
Proposal ရဲ့ အဓိကရည်ရွယ်ချက်ကို ဖော်ပြတဲ့ ခေါင်းစဉ်တစ်ခု ရေးပါ။ ဥပမာ – “ရန်ကုန်မြို့ရဲ့ အမှိုက်ပြဿနာကို ဖြေရှင်းရန် အဆိုပြုလွှာ”

2.  နိဒါန်း (Introduction)
ဘာ project လဲ၊ ဘာကြောင့်လုပ်ချင်တာလဲ ဆိုတာကို စပြောပါ။ project ရဲ့ နောက်ခံအကြောင်းအရာ (background) ကို အကျဉ်းချုပ်ထည့်ပါ။ ဘာပြဿနာကို ဖြေရှင်းချင်တာလဲ၊ ဘာအခွင့်အရေးကို ဖန်တီးချင်တာလဲ ဆိုတာကို ရှင်းပြပါ။ဒီ project က ဘယ်သူတွေအတွက် အကျိုးရှိမလဲဆိုတာ ပြောပြပါ။

3.  ရည်ရွယ်ချက်များ (Objectives)
ဘာတွေလုပ်ဖို့ ရည်ရွယ်ထားလဲဆိုတာကို တိတိကျကျ ဖော်ပြပါ။ ဥပမာ – “အမှိုက်သိမ်းဆည်းတဲ့စနစ်ကို တိုးတက်အောင်လုပ်မယ်”၊ “ပြည်သူတွေကို အမှိုက်နဲ့ပတ်သက်တဲ့ အသိပညာပေးမယ်” စသဖြင့် ရေးပါ။ SMART ဆိုတဲ့အတိုင်း Specific (တိကျမှု), Measurable (တိုင်းတာလို့ရ), Achievable (အောင်မြင်နိုင်မှု), Relevant (သက်ဆိုင်မှု), Time-bound (အချိန်ကာလသတ်မှတ်ထားမှု) ဖြစ်ဖို့လိုပါတယ်။

4.  လုပ်ငန်းအစီအစဉ် (Project Plan)
project ကို ဘယ်လိုအဆင့်တွေနဲ့ လုပ်ဆောင်သွားမလဲဆိုတာကို အသေးစိတ်ရေးပါ။ လုပ်ငန်းတစ်ခုချင်းစီအတွက် ဘယ်လိုနည်းလမ်းတွေသုံးမလဲဆိုတာ ရှင်းပြပါ။ အချိန်ဇယား (Timeline) ကိုလည်း ထည့်သွင်းပါ။ ဥပမာ – “ပထမလမှာ လေ့လာဆန်းစစ်မယ်”၊ “ဒုတိယလမှာ သင်တန်းပေးမယ်” စသဖြင့် ရေးပါ။

5.  ကုန်ကျစရိတ် (Budget)
project တစ်ခုလုံးအတွက် ဘယ်လောက်ကုန်ကျမလဲဆိုတာကို အသေးစိတ်ခွဲပြီး စာရင်းလုပ်ပါ။ ဝန်ထမ်းခ၊ စက်ပစ္စည်းဝယ်ယူခ၊ သင်တန်းစရိတ်၊ သယ်ယူပို့ဆောင်စရိတ် စတာတွေကို တစ်ခုချင်းစီ ခွဲရေးပါ။ ရန်ပုံငွေ ဘယ်ကရမလဲဆိုတာကိုလည်း ထည့်ရေးပါ။

6.  အကဲဖြတ်ခြင်း (Evaluation)
project ပြီးသွားတဲ့အခါ ရလဒ်တွေကို ဘယ်လိုတိုင်းတာမလဲဆိုတာကို ရှင်းပြပါ။ အောင်မြင်မှုတွေကို ဘယ်လိုသိနိုင်မလဲဆိုတာကို ဖော်ပြပါ။ ဥပမာ – “သင်တန်းတက်ရောက်သူ ဘယ်နှစ်ယောက်ရဲ့ အသိပညာတိုးတက်လာလဲ”၊ “အမှိုက်ဘယ်နှစ်တန် လျှော့ချနိုင်လဲ” စသဖြင့် ရေးပါ။

7.  အဖွဲ့အစည်းအကြောင်း (About Us)
proposal တင်တဲ့ အဖွဲ့အစည်းရဲ့ ရည်ရွယ်ချက်၊ လုပ်ဆောင်နေတဲ့ လုပ်ငန်းတွေနဲ့ အတွေ့အကြုံတွေကို ဖော်ပြပါ။  အရင်က လုပ်ခဲ့တဲ့ project တွေရဲ့ အောင်မြင်မှုတွေကို ထည့်ရေးရင် ပိုကောင်းပါတယ်။

8.  နောက်ဆက်တွဲ (Appendix):
project နဲ့ သက်ဆိုင်တဲ့ အထောက်အထားတွေ၊ စာရင်းဇယားတွေ၊ ပုံတွေ စတာတွေကို ထည့်ပါ။ အခြားလိုအပ်တဲ့ အချက်အလက်တွေကိုလည်း ထည့်နိုင်ပါတယ်။

ရေးတဲ့အခါ သတိထားရမယ့်အချက်တွေကတော့
• ရှင်းလင်းတိကျပါစေ: စာလုံးပေါင်း မှန်ကန်ပြီး ဖတ်ရလွယ်ကူတဲ့ စကားလုံးတွေကို သုံးပါ။
• ယုံကြည်မှုရှိပါစေ: ကိုယ့် project ကို ယုံကြည်မှုအပြည့်နဲ့ တင်ပြပါ။
• အထောက်အထားခိုင်လုံပါစေ: ကိန်းဂဏန်းတွေ၊ စာရင်းဇယားတွေနဲ့ ထောက်ခံပါ။
• ဆွဲဆောင်မှုရှိပါစေ: စိတ်ဝင်စားဖို့ကောင်းတဲ့ နိဒါန်းနဲ့ စတင်ပါ။
• သတ်ပုံသတ်ညွှန်း မှန်ကန်ပါစေ- သတ်ပုံသတ်ညွှန်းတွေကို သေချာစစ်ဆေးပါ။

ဒါတွေကတော့ proposal တစ်စောင်ရေးတဲ့အခါ အဓိကထည့်သွင်းစဉ်းစားရမယ့် အချက်တွေပဲဖြစ်ပါတယ်။ အသေးစိတ်ကိုယ့်ရဲ့ project ပေါ်မူတည်ပြီး ပြောင်းလဲနိုင်ပါတယ်။

Proposal တွေမှာ အမျိုးအစားတွေ အများကြီးရှိပါတယ်။ ဘယ်လိုရည်ရွယ်ချက်နဲ့ ရေးတာလဲ၊ ဘယ်သူ့ကို တင်ပြတာလဲပေါ် မူတည်ပြီး အမျိုးအစားတွေ ကွဲပြားသွားနိုင်ပါတယ်။ အဓိကတွေ့ရများတဲ့ proposal အမျိုးအစားတွေကတော့

၁။ လုပ်ငန်းဆိုင်ရာ Proposal (Business Proposals)

တောင်းခံမှုမရှိသော Proposal (Unsolicited Proposal):
ကိုယ့်ဖာသာ စိတ်ကူးရပြီး လုပ်ငန်းတစ်ခုကို တင်ပြတာပါ။ ဥပမာ – ကုမ္ပဏီတစ်ခုက နောက်ထပ် ကုမ္ပဏီတစ်ခုကို သူတို့ရဲ့ ဝန်ဆောင်မှုတွေကို သုံးဖို့ တင်ပြတာမျိုးပါ။

တောင်းခံမှုရှိသော Proposal (Solicited Proposal):
အစိုးရ ဒါမှမဟုတ် ကုမ္ပဏီတစ်ခုက သူတို့လိုအပ်နေတဲ့ အရာတစ်ခုအတွက် proposal တင်ခိုင်းလို့ တင်ပြတာပါ။ ဥပမာ – အစိုးရက လမ်းဆောက်ဖို့အတွက် proposal ခေါ်တာမျိုးပါ။

Grant Proposal: အဖွဲ့အစည်းတစ်ခုက ရန်ပုံငွေ (grant) ရဖို့အတွက် တင်ပြတဲ့ proposal မျိုးပါ။ အများအားဖြင့် အစိုးရမဟုတ်တဲ့ အဖွဲ့အစည်း (NGO) တွေက တင်လေ့ရှိပါတယ်။

၂။ သုတေသန Proposal (Research Proposals)

ဒီ proposal အမျိုးအစားကို သုတေသနလုပ်ဖို့အတွက် ရေးပါတယ်။ ဘာကိုလေ့လာမယ်၊ ဘယ်လိုလေ့လာမယ်၊ ဘာရလဒ်တွေ မျှော်လင့်ထားလဲ စတာတွေကို အသေးစိတ်ရေးရပါတယ်။ တက္ကသိုလ်တွေမှာ ဒီ proposal မျိုးကို အများဆုံးတွေ့ရပါတယ်။

၃။ ပရောဂျက် Proposal (Project Proposals)

ပရောဂျက်တစ်ခုကို စတင်ဖို့ ဒါမှမဟုတ် အကောင်အထည်ဖော်ဖို့အတွက် ရေးတဲ့ proposal မျိုးပါ။ ဘာလုပ်မယ်၊ ဘယ်လိုလုပ်မယ်၊ ဘယ်လောက်ကုန်ကျမယ် စတာတွေကို အသေးစိတ်ရေးရပါတယ်။ ဥပမာ – ဆော့ဖ်ဝဲလ်တစ်ခု တီထွင်ဖို့၊ အဆောက်အအုံတစ်ခု ဆောက်ဖို့ စတာတွေအတွက် ရေးတာပါ။

၄။ ရောင်းချခြင်း Proposal (Sales Proposals)

ကုန်ပစ္စည်းတစ်ခု ဒါမှမဟုတ် ဝန်ဆောင်မှုတစ်ခုကို ရောင်းချဖို့အတွက် ရေးတဲ့ proposal မျိုးပါ။ ဘာကြောင့် ဒီပစ္စည်း ဒါမှမဟုတ် ဝန်ဆောင်မှုကို ဝယ်သင့်လဲဆိုတာကို ဆွဲဆောင်နိုင်အောင် ရေးရပါတယ်။

၅။ စပွန်ဆာရှာဖွေရေး Proposal (Sponsorship Proposals)

အဖွဲ့အစည်းတစ်ခု ဒါမှမဟုတ် ပွဲတစ်ခုအတွက် စပွန်ဆာ (sponsor) ရှာဖွေဖို့ ရေးတဲ့ proposal မျိုးပါ။ ဘာကြောင့် စပွန်ဆာပေးသင့်လဲ၊ စပွန်ဆာပေးရင် ဘာအကျိုးအမြတ်တွေ ရနိုင်လဲဆိုတာကို ရှင်းပြရပါတယ်။

၆။ အတွင်းရေး Proposal (Internal Proposals)

ကုမ္ပဏီတစ်ခုအတွင်းမှာပဲ အသုံးပြုတဲ့ proposal မျိုးပါ။ ဌာနတစ်ခုက နောက်ဌာနတစ်ခုကို အကြံဉာဏ်ပေးတာ ဒါမှမဟုတ် လုပ်ငန်းတစ်ခုကို အဆိုပြုတာမျိုးပါ။

ဒါတွေကတော့ အဓိကတွေ့ရများတဲ့ proposal အမျိုးအစားတွေပါ။ တကယ်တမ်းမှာ ဒီထက်ပိုပြီး အမျိုးအစားတွေ အများကြီးရှိနိုင်ပါတယ်။ ကိုယ်ရေးမယ့် proposal က ဘယ်အမျိုးအစားထဲမှာ ပါလဲဆိုတာကို သေချာသိထားရင် proposal ကို ပိုပြီးထိရောက်အောင် ရေးနိုင်ပါတယ်။

Proposal တစ်စောင်ကို ဘယ်လိုပုံစံနဲ့ ရေးရမလဲဆိုတာကိုလည်း တလက်စတည်း ပြောပြပေးချင်ပါတယ်။

၁။ ဖောင့် (Font) နဲ့ စာမျက်နှာ (Page) အပြင်အဆင်

ဖောင့်
ဖတ်ရလွယ်ကူတဲ့ ဖောင့်ကိုသုံးပါ။ Arial, Times New Roman, Calibri စတာတွေက အသုံးများပါတယ်။ ဖောင့်ဆိုဒ် (font size) ကို ၁၁ ဒါမှမဟုတ် ၁၂ ထားပါ။

စာမျက်နှာအနားသတ် (Margins)
ဘယ်၊ ညာ၊ အပေါ်၊ အောက် ၁ လက်မစီ ချန်ထားပါ။

လိုင်းခြား (Line Spacing)
1.5 ဒါမှမဟုတ် Double space သုံးပါ။ ဖတ်ရတာ ပိုရှင်းပါတယ်။
  
စာမျက်နှာနံပါတ်
စာမျက်နှာတိုင်းမှာ နံပါတ်ထည့်ပါ။ အောက်ခြေ (footer) မှာ ထည့်လေ့ရှိပါတယ်။

၂။ အပေါ်စာမျက်နှာ (Cover Page)

Proposal ရဲ့ ခေါင်းစဉ် (Title)
တင်ပြတဲ့သူရဲ့ နာမည်နဲ့ အဖွဲ့အစည်း (Your Name and Organization)
လက်ခံရရှိမယ့်သူရဲ့ နာမည်နဲ့ အဖွဲ့အစည်း (Recipient’s Name and Organization)
တင်ပြတဲ့ ရက်စွဲ (Date)

၃။ အနှစ်ချုပ် (Executive Summary)

Proposal ရဲ့ အဓိကအချက်တွေကို အကျဉ်းချုပ် ရေးပါ။ ဘာပြဿနာကို ဖြေရှင်းမှာလဲ၊ ဘယ်လိုနည်းလမ်းတွေ သုံးမှာလဲ၊ ဘာရလဒ်တွေ မျှော်လင့်ထားလဲ စတာတွေကို ဖော်ပြပါ။ ဒါက proposal ရဲ့ အရေးကြီးဆုံးအပိုင်းတစ်ခုပါ။ ဘာလို့လဲဆိုတော့ လူတွေက ဒီအပိုင်းကို အရင်ဆုံးဖတ်ပြီး ဆက်ဖတ်သင့် မဖတ်သင့် ဆုံးဖြတ်လို့ပါ။

၄။ နိဒါန်း (Introduction)

နောက်ခံအကြောင်းအရာ (Background): ဘာကြောင့် ဒီ proposal ကို ရေးရတာလဲဆိုတဲ့ အကြောင်းကို ရှင်းပြပါ။ ဘာပြဿနာကို ဖြေရှင်းချင်တာလဲဆိုတာကို တိတိကျကျ ရေးပါ။ ဘာကို အောင်မြင်အောင် လုပ်ချင်တာလဲဆိုတဲ့ ရည်ရွယ်ချက်ကိုလည်း ဖော်ပြပါ။

၅။ ရည်မှန်းချက်များ (Objectives)

SMART ရည်မှန်းချက်တွေဖြစ်တဲ့ (Specific, Measurable, Achievable, Relevant, Time-bound) ကို သုံးပြီး ရေးပါ။ ဥပမာ: “သုံးလအတွင်းမှာ ရပ်ကွက်အတွင်း အမှိုက်ပမာဏကို ၂၀% လျှော့ချမယ်”

၆။ နည်းလမ်း (Methodology)

ဘယ်လိုနည်းလမ်းတွေနဲ့ ရည်မှန်းချက်ကို အောင်မြင်အောင် လုပ်မလဲဆိုတာကို အသေးစိတ် ရေးပါ။ လုပ်ဆောင်ရမယ့် အဆင့်တွေ (Steps)၊ အချိန်ဇယား (Timeline) နဲ့ ဘယ်သူတွေ ပါဝင်မလဲဆိုတာကို ရှင်းပြပါ။

၇။ ခန့်မှန်းကုန်ကျစရိတ် (Budget)

စီမံကိန်းတစ်ခုလုံးအတွက် ကုန်ကျစရိတ်ကို အသေးစိတ် ခွဲခြားပြီး ရေးပါ။ ဝန်ထမ်းလစာ (Salaries), ပစ္စည်းဝယ်ယူစရိတ် (Materials), သယ်ယူပို့ဆောင်စရိတ် (Transportation) စတာတွေကို ထည့်ရေးပါ။ ရန်ပုံငွေရရှိမည့် အရင်းအမြစ် (Funding Sources) ကိုလည်း ဖော်ပြပါ။

၈။ အကဲဖြတ်ခြင်း (Evaluation)

စီမံကိန်းရဲ့ ရလဒ်တွေကို ဘယ်လို တိုင်းတာမလဲဆိုတာကို ရှင်းပြပါ။ အောင်မြင်မှုကို ဘယ်လိုသိနိုင်မလဲဆိုတာကို တိတိကျကျ ဖော်ပြပါ။

၉။ အဖွဲ့အစည်းအကြောင်း (Organization Information)

အဖွဲ့အစည်းရဲ့ နောက်ခံသမိုင်း (Background)
ရည်ရွယ်ချက်နဲ့ လုပ်ဆောင်နေတဲ့ လုပ်ငန်းများ (Mission and Activities)
အရင်က လုပ်ခဲ့တဲ့ စီမံကိန်းတွေရဲ့ အောင်မြင်မှု (Past Successes)

၁၀။ နောက်ဆက်တွဲ (Appendix)
သက်ဆိုင်ရာ စာရွက်စာတမ်းများ (Relevant Documents)
စာရင်းဇယားများ (Data and Statistics)
ထောက်ခံစာများ (Letters of Support)

ပုံစံ (Format) နဲ့ပတ်သက်ပြီး အကြံပြုချက်များ

ခေါင်းစဉ်များ (Headings): ခေါင်းစဉ်တွေကို ရှင်းရှင်းလင်းလင်းနဲ့ စနစ်တကျ တပ်ဆင်ပါ။
စာပိုဒ်များ (Paragraphs): စာပိုဒ်တွေကို တိုတိုနဲ့ ထိထိမိမိ ရေးပါ။
စာရင်းများ (Lists): အချက်အလက်တွေကို စာရင်းနဲ့ ဖော်ပြတာက ဖတ်ရတာ ပိုလွယ်ကူပါတယ်။
ဇယားများနှင့် ပုံများ (Tables and Figures): ကိန်းဂဏန်းတွေနဲ့ အချက်အလက်တွေကို ဇယားနဲ့ ပုံတွေသုံးပြီး ဖော်ပြပါ။

နမူနာပုံစံလေးတစ်ခုရေးပြပါမယ်

ခေါင်းစီးစာမျက်နှာ (Cover Page)

   ခေါင်းစဉ်: ရန်ကုန်မြို့ရှိ လမ်းဘေးခွေးများအတွက် အစားအစာနှင့် ဆေးဝါးထောက်ပံ့ရေး စီမံကိန်း
   တင်ပြသူ: မေတ္တာလက်များအဖွဲ့
   လက်ခံသူ: ရန်ကုန်မြို့တော်စည်ပင်သာယာရေးကော်မတီ
   ရက်စွဲ: ၂၀၂၆ ခုနှစ် ဖေဖော်ဝါရီလ ၂၆ ရက်

အနှစ်ချုပ် (Executive Summary)

မေတ္တာလက်များအဖွဲ့သည် ရန်ကုန်မြို့ရှိ လမ်းဘေးခွေးများ၏ အစာရေစာနှင့် ကျန်းမာရေးကို အထောက်အကူပြုရန် ရည်ရွယ်ပါသည်။ ဤစီမံကိန်းသည် ခွေးများအတွက် အစားအစာနှင့် ဆေးဝါးများ ပံ့ပိုးပေးခြင်း၊ ကာကွယ်ဆေးထိုးခြင်းနှင့် ခွေးရူးပြန်ရောဂါ ကာကွယ်ရေးတို့ကို အဓိကထား လုပ်ဆောင်သွားမည်ဖြစ်သည်။ စီမံကိန်းကာလမှာ တစ်နှစ်ဖြစ်ပြီး ခန့်မှန်းကုန်ကျစရိတ်မှာ သိန်း ၅၀ ဖြစ်ပါသည်။

၁။ နိဒါန်း (Introduction)

  နောက်ခံအကြောင်းအရာ: ရန်ကုန်မြို့တွင် လမ်းဘေးခွေးများ များပြားလာခြင်းသည် အစာရေစာရှားပါးမှုနှင့် ရောဂါဘယများ ဖြစ်ပွားစေပါသည်။
   ပြဿနာဖော်ထုတ်ခြင်း: လမ်းဘေးခွေးများအတွက် လုံလောက်သော အစားအစာနှင့် ဆေးဝါးများ မရှိခြင်းသည် လူမှုရေးနှင့် ကျန်းမာရေးဆိုင်ရာ စိန်ခေါ်မှုတစ်ရပ် ဖြစ်လာပါသည်။
   ရည်ရွယ်ချက်: လမ်းဘေးခွေးများ၏ အသက်ရှင်သန်မှုကို မြှင့်တင်ရန်နှင့် ရောဂါများ ကာကွယ်ရန်။

၂။ ရည်မှန်းချက်များ (Objectives)

   လမ်းဘေးခွေး ၅၀၀ ကောင်ကို တစ်နှစ်အတွင်း အစားအစာ ပုံမှန်ထောက်ပံ့ပေးရန်။
   ခွေးကောင်ရေ ၃၀၀ ကို ကာကွယ်ဆေးထိုးပေးရန်။
   ခွေးရူးပြန်ရောဂါနှင့်ပတ်သက်၍ ပြည်သူများအား အသိပညာပေးခြင်း။

၃။ နည်းလမ်း (Methodology)

   အစားအစာနှင့် ဆေးဝါးများ စုဆောင်းခြင်း: အလှူငွေများ စုဆောင်းခြင်းနှင့် အဖွဲ့အစည်းများထံမှ အကူအညီရယူခြင်း။
   အစားအစာ ဖြန့်ဝေခြင်း: နေ့စဉ် အစားအစာများကို သတ်မှတ်နေရာများတွင် ဖြန့်ဝေပေးခြင်း။
   ကာကွယ်ဆေးထိုးခြင်း: တိရစ္ဆာန်ဆေးကုဆရာဝန်များနှင့် ပူးပေါင်း၍ ကာကွယ်ဆေးထိုးခြင်း။
   အသိပညာပေးခြင်း: ပိုစတာများ၊ လက်ကမ်းစာစောင်များနှင့် လူမှုကွန်ရက်များမှတစ်ဆင့် အသိပညာပေးခြင်း။
   အချိန်ဇယား:
       လ ၁-၂: ရန်ပုံငွေရှာဖွေခြင်းနှင့် အစားအစာများ စုဆောင်းခြင်း။
       လ ၃-၆: အစားအစာများ ဖြန့်ဝေခြင်းနှင့် ကာကွယ်ဆေးထိုးခြင်း။
       လ ၇-၁၂: အသိပညာပေးခြင်းနှင့် စီမံကိန်းကို အကဲဖြတ်ခြင်း။

၄။ ခန့်မှန်းကုန်ကျစရိတ် (Budget)

   အစားအစာဝယ်ယူစရိတ်: သိန်း ၂၀
   ဆေးဝါးနှင့် ကာကွယ်ဆေးစရိတ်: သိန်း ၁၅
   အသိပညာပေးပစ္စည်းများ ထုတ်လုပ်ခြင်းစရိတ်: သိန်း ၅
   ဝန်ထမ်းစရိတ်: သိန်း ၁၀
   စုစုပေါင်း: သိန်း ၅၀

၅။ အကဲဖြတ်ခြင်း (Evaluation)

   စီမံကိန်း၏ အောင်မြင်မှုကို တိုင်းတာရန်အတွက် အောက်ပါအချက်များကို အသုံးပြုမည်:
       အစားအစာရရှိသော ခွေးအရေအတွက်
       ကာကွယ်ဆေးထိုးပြီးသော ခွေးအရေအတွက်
       အသိပညာပေးပွဲများသို့ တက်ရောက်သူအရေအတွက်
       စီမံကိန်းနှင့်ပတ်သက်သော ပြည်သူများ၏ သဘောထားအမြင် စစ်တမ်း

၆။ အဖွဲ့အစည်းအကြောင်း (Organization Information)

   မေတ္တာလက်များအဖွဲ့သည် ၂၀၁၅ ခုနှစ်တွင် စတင်တည်ထောင်ခဲ့ပြီး တိရစ္ဆာန်များ၏ သက်သာချောင်ချိရေးအတွက် လုပ်ဆောင်နေသောအဖွဲ့ဖြစ်သည်။
   ယခင်စီမံကိန်းများတွင် လမ်းဘေးတိရစ္ဆာန်များအား အစားအစာနှင့် ဆေးဝါးများ ထောက်ပံ့ပေးခြင်း၊ ခွေးရူးပြန်ရောဂါ ကာကွယ်ရေးလုပ်ငန်းများ လုပ်ဆောင်ခဲ့သည်။

၇။ နောက်ဆက်တွဲ (Appendix)

   အဖွဲ့အစည်း၏ မှတ်ပုံတင်မိတ္တူ
   ယခင်စီမံကိန်းများ၏ အစီရင်ခံစာများ
   ထောက်ခံစာများ

နပေတိုး