ဒီနေရာမှာ SMART ဆိုတာ ရည်မှန်းချက်သတ်မှတ်တဲ့ SMART မဟုတ်ဘဲ လူတစ်ယောက်နဲ့တစ်ယောက် ဆက်ဆံပြောဆိုတဲ့အခါ အသုံးဝင်တဲ့ အချက်ငါးချက်ကို ဆိုလိုတာပါ။ အဲဒါတွေကတော့ Specific၊ Mindfulness၊ Attitude၊ Relevant နဲ့ Tolerance တို့ ဖြစ်ပါတယ်။ ဒီအချက်ငါးချက်ကို လိုက်နာပြီး ပြောဆိုနိုင်ရင် ကိုယ်ပြောချင်တဲ့အကြောင်းအရာကို တစ်ဖက်လူက ပိုမိုနားလည်နိုင်သလို အပြန်အလှန်ယုံကြည်မှုနဲ့ ဆက်ဆံရေးလည်း ပိုကောင်းလာနိုင်ပါတယ်။
Specific – တိကျရှင်းလင်းစွာ ပြောဆိုခြင်း
Specific ဆိုတာ ကိုယ်ပြောချင်တဲ့အကြောင်းအရာကို ဝေဝါးမနေဘဲ တိတိကျကျ ပြောဆိုတာကို ဆိုလိုပါတယ်။ လူတစ်ယောက်ကို “မင်းအလုပ်လုပ်တာ မကောင်းဘူး” လို့ ပြောလိုက်ရင် ဘယ်အပိုင်းက မကောင်းတာလဲ၊ ဘာကိုပြင်ရမလဲဆိုတာ တစ်ဖက်လူက မသိနိုင်ပါဘူး။ အဲဒီအစား “မနေ့က ပေးထားတဲ့ Report မှာ အရောင်းစာရင်းနဲ့ စုစုပေါင်းစာရင်း မကိုက်ညီတာတွေ့တယ်။ အဲဒီအပိုင်းကို ဒီနေ့ ညနေမတိုင်ခင် ပြန်စစ်ပေးပါ” လို့ ပြောရင် ပိုမိုရှင်းလင်းပါတယ်။
အလုပ်ခွင်မှာ ဝန်ထမ်းတစ်ယောက်ကို တာဝန်ပေးတဲ့အခါလည်း “ဒီအလုပ်ကို မြန်မြန်လုပ်ပေးပါ” လို့ မပြောဘဲ “ဒီ Attendance Report ကို မနက်ဖြန်နေ့လယ် ၂ နာရီမတိုင်ခင် ပြင်ဆင်ပေးပါ။ ဌာနအလိုက် ဝန်ထမ်းဦးရေနဲ့ နောက်ကျရောက်မှုစာရင်းကို ထည့်ပေးပါ” လို့ ပြောသင့်ပါတယ်။ ဒီလိုပြောလိုက်ရင် ကိုယ်လိုချင်တဲ့ ရလဒ်ကို တစ်ဖက်လူက ပိုမိုနားလည်နိုင်ပါတယ်။
Mindfulness – သတိရှိရှိ နားထောင်ပြီး ပြောဆိုခြင်း
Mindfulness ဆိုတာ စကားပြောတဲ့အခါ ကိုယ်ပြောမယ့်စကားကိုသာ အာရုံစိုက်တာမဟုတ်ဘဲ တစ်ဖက်လူရဲ့ စကား၊ ခံစားချက်နဲ့ အခြေအနေကိုလည်း သတိထားနားထောင်တာ ဖြစ်ပါတယ်။ တစ်ဖက်လူက စကားပြောနေတဲ့အချိန်မှာ ဖုန်းကြည့်နေတာ၊ ကြားဖြတ်ပြောတာ၊ ကိုယ်ပြန်ပြောမယ့်စကားကိုပဲ စဉ်းစားနေတာမျိုး မလုပ်သင့်ပါဘူး။
ဥပမာ ဝန်ထမ်းတစ်ယောက်က “ဒီအလုပ်ကို သတ်မှတ်ထားတဲ့အချိန်အတွင်း မပြီးနိုင်တော့ဘူးထင်တယ်” လို့ ပြောလာရင် “အဲဒါလောက်တောင် မလုပ်နိုင်ဘူးလား” လို့ ချက်ချင်းမပြောဘဲ “မပြီးနိုင်ဘူးလို့ ခံစားရတဲ့အကြောင်းရင်းကို ပြောပြပေးပါ။ ဘယ်အပိုင်းမှာ အခက်အခဲရှိနေလဲ” လို့ အေးအေးဆေးဆေး မေးသင့်ပါတယ်။
ဒီလိုနားထောင်တဲ့အခါ တစ်ဖက်လူရဲ့ ပြဿနာကို ပိုမိုမှန်ကန်စွာ သိနိုင်ပါတယ်။ တစ်ခါတလေ ဝန်ထမ်းက အလုပ်မလုပ်ချင်လို့ မဟုတ်ဘဲ အလုပ်များလွန်းတာ၊ ညွှန်ကြားချက် မရှင်းတာ ဒါမှမဟုတ် အခြားဌာနက အချက်အလက် မပေးသေးတာကြောင့် ဖြစ်နိုင်ပါတယ်။
Attitude – အပြုသဘောဆောင်သော သဘောထားဖြင့် ပြောဆိုခြင်း
Attitude ဆိုတာ စကားပြောတဲ့အခါ ကိုယ့်ရဲ့ စိတ်နေစိတ်ထားနဲ့ သဘောထားကို ဆိုလိုပါတယ်။ စကားလုံးတွေက တူတူပဲဖြစ်ပေမယ့် ပြောတဲ့အသံ၊ မျက်နှာအမူအရာနဲ့ သဘောထားပေါ်မူတည်ပြီး တစ်ဖက်လူရဲ့ ခံစားချက်က ကွာခြားနိုင်ပါတယ်။
ဥပမာ “မင်းက ဒီအလုပ်ကို အမြဲမှားတယ်” လို့ ပြောတာက အပြစ်တင်သလို ဖြစ်ပါတယ်။ အဲဒီအစား “ဒီအလုပ်မှာ အချက်အလက်နှစ်ခု မှားနေပါတယ်။ အမှားကို ပြင်ပြီး နောက်တစ်ကြိမ် မဖြစ်အောင် Checklist တစ်ခု အသုံးပြုကြရအောင်” လို့ ပြောရင် ပိုမိုအပြုသဘောဆောင်ပါတယ်။
အလုပ်ခွင်မှာ ပြဿနာကို ထောက်ပြရတဲ့အခါ ဝန်ထမ်းရဲ့ တန်ဖိုးကို မထိခိုက်အောင် ပြောသင့်ပါတယ်။ “မင်းက မတော်ဘူး” လို့ မပြောဘဲ “ဒီအလုပ်မှာ ပြင်ဆင်ဖို့လိုတဲ့အပိုင်း ရှိပါတယ်။ အဲဒီအပိုင်းကို ပြင်ဆင်နိုင်အောင် ကျွန်တော်က လိုအပ်တဲ့အကူအညီ ပေးပါမယ်” လို့ ပြောသင့်ပါတယ်။ ဒီလိုပြောရင် တစ်ဖက်လူက ကာကွယ်ပြောဆိုဖို့ထက် ပြင်ဆင်ဖို့ ပိုမိုစိတ်ဝင်စားလာနိုင်ပါတယ်။
Relevant – အကြောင်းအရာနဲ့ သက်ဆိုင်အောင် ပြောဆိုခြင်း
Relevant ဆိုတာ ကိုယ်ပြောမယ့်စကားက လက်ရှိအကြောင်းအရာနဲ့ သက်ဆိုင်ပြီး လိုအပ်တဲ့အချက်ကိုသာ ပြောဆိုတာ ဖြစ်ပါတယ်။ ပြဿနာတစ်ခုကို ဆွေးနွေးတဲ့အခါ အတိတ်က အကြောင်းအရာဟောင်းတွေ၊ မသက်ဆိုင်တဲ့ ပုဂ္ဂိုလ်ရေးကိစ္စတွေကို ထည့်ပြောရင် ဆွေးနွေးမှုက ရှုပ်ထွေးသွားနိုင်ပါတယ်။
ဥပမာ ဝန်ထမ်းတစ်ယောက်ရဲ့ Report မှာ အမှားတွေ့လို့ ပြောတဲ့အခါ အဲဒီ Report ရဲ့ အမှားနဲ့ ပြင်ဆင်ရမယ့်နည်းလမ်းကိုပဲ ဆွေးနွေးသင့်ပါတယ်။ “ပြီးခဲ့တဲ့နှစ်ကလည်း မင်းအလုပ်နောက်ကျခဲ့တယ်၊ မင်းအမြဲတမ်း ဒီလိုပဲ” လို့ အတိတ်ကကိစ္စတွေကို ပြန်ဆွဲထည့်တာက လက်ရှိပြဿနာကို မဖြေရှင်းနိုင်ပါဘူး။ အဲဒီအစား “ဒီနေ့တင်ပြထားတဲ့ Report မှာ စုစုပေါင်းစာရင်း မကိုက်ညီတဲ့အချက်ကိုပဲ အရင်ပြင်ကြရအောင်” လို့ ပြောသင့်ပါတယ်။
Team meeting မှာလည်း အစည်းအဝေးရဲ့ အဓိကအကြောင်းအရာနဲ့ မသက်ဆိုင်တဲ့ စကားတွေကို လျှော့ချသင့်ပါတယ်။ ဥပမာ ဝန်ထမ်းတက်ကြွမှု တိုးတက်ရေးကို ဆွေးနွေးနေတဲ့အချိန်မှာ အလုပ်ခွင်နဲ့ မသက်ဆိုင်တဲ့ ကိုယ်ရေးကိုယ်တာအကြောင်းတွေကို အကြာကြီး မဆွေးနွေးသင့်ပါဘူး။ ဒီလိုလုပ်ရင် အချိန်ကို ထိရောက်စွာ အသုံးချနိုင်ပြီး အဓိကရည်ရွယ်ချက်ကိုလည်း မပျောက်စေပါဘူး။
Tolerance – သည်းခံနားလည်ပေးခြင်း
Tolerance ဆိုတာ တစ်ဖက်လူရဲ့ အမြင်၊ အကျင့်စရိုက်၊ အတွေ့အကြုံနဲ့ အားနည်းချက်တွေ မတူညီနိုင်တာကို နားလည်ပြီး သည်းခံဆက်ဆံတာ ဖြစ်ပါတယ်။ လူတိုင်းက ကိုယ်လိုထင်တာ၊ ကိုယ်လိုပြောတာနဲ့ တူမှာမဟုတ်ပါဘူး။ ဒါကြောင့် အမြင်မတူတဲ့အခါ ချက်ချင်းဒေါသထွက်ခြင်း ဒါမှမဟုတ် တစ်ဖက်လူကို မလေးစားတဲ့စကား ပြောခြင်း မပြုသင့်ပါဘူး။
ဥပမာ Team member တစ်ယောက်က ကိုယ့်အကြံပြုချက်ကို မသဘောတူဘဲ “ဒီနည်းလမ်းက အလုပ်မဖြစ်နိုင်ဘူးလို့ ထင်ပါတယ်” လို့ ပြောလာရင် “မင်းက အမြဲတမ်း ဆန့်ကျင်နေတာပဲ” လို့ မပြောသင့်ပါဘူး။ အဲဒီအစား “မင်းက ဘာကြောင့် အဲဒီလိုထင်တာလဲ။ မင်းအမြင်အရ ပိုကောင်းမယ့်နည်းလမ်းရှိရင် ပြောပြပေးပါ” လို့ မေးသင့်ပါတယ်။
အလုပ်ခွင်မှာ လူမျိုး၊ အသက်၊ အတွေ့အကြုံနဲ့ အလုပ်လုပ်ပုံမတူတဲ့သူတွေ အတူတကွ လုပ်ကိုင်ရတာကြောင့် Tolerance က အထူးအရေးကြီးပါတယ်။ အမြင်မတူတာကို ပြဿနာလို့ မမြင်ဘဲ ပိုမိုကောင်းမွန်တဲ့ အကြံပြုချက်ရနိုင်တဲ့ အခွင့်အရေးတစ်ခုလို့ မြင်သင့်ပါတယ်။
အနှစ်ချုပ်ပြောရရင် လူတစ်ယောက်နဲ့တစ်ယောက် ဆက်ဆံပြောဆိုတဲ့အခါ Specific ဖြစ်အောင် တိကျစွာပြောရမယ်၊ Mindfulness နဲ့ သတိရှိရှိ နားထောင်ရမယ်၊ Attitude ကောင်းကောင်းနဲ့ အပြုသဘောဆောင်စွာ ပြောရမယ်၊ Relevant ဖြစ်အောင် အကြောင်းအရာနဲ့ သက်ဆိုင်တာကိုပဲ ပြောရမယ်၊ Tolerance ရှိရှိနဲ့ တစ်ဖက်လူရဲ့ အမြင်ကို သည်းခံနားလည်ပေးရမယ်။
အလွယ်မှတ်ရမယ်ဆိုရင်— “တိကျစွာပြောပါ၊ သတိရှိရှိနားထောင်ပါ၊ သဘောထားကောင်းကောင်းနဲ့ ပြောပါ၊ သက်ဆိုင်တာကိုပဲ ပြောပါ၊ အမြင်မတူရင် သည်းခံနားလည်ပေးပါ” ဆိုတာပဲ ဖြစ်ပါတယ်။ ဒီအချက်တွေကို နေ့စဉ် Office work မှာ အသုံးချနိုင်ရင် ဝန်ထမ်းအချင်းချင်း ဆက်ဆံရေးကောင်းမွန်လာပြီး Teamwork နဲ့ လုပ်ငန်းရလဒ်တွေလည်း ပိုမိုတိုးတက်လာနိုင်ပါတယ်။
Discover more from naywinaung
Subscribe to get the latest posts sent to your email.